Հարգելի՛ քաղաքացիներ,

Տեղեկացնում ենք, որ Հայաստանի անշարժ գույքի տեղեկատվական համակարգը ինտեգրվել է Քաղաքաշինության ոլորտի թվային ծառայությունների հարթակի հետ, որը հնարավորություն է տալիս պետական գրանցման դիմումին կից ներկայացնել շինարարության թույլտվություններ և քաղաքաշինական այլ փաստաթղթեր՝ հատուկ ծածկագրերի մուտքագրման միջոցով։ Այս փոփոխության արդյունքում՝ Հայաստանի անշարժ գույքի տեղեկատվական համակարգում և էլեկտրոնային ծառայությունների մատուցման հարթակում (e-cadastre.am) ներդրվել է նոր գործիք, որի միջոցով ներկայացվող փաստաթղթերը կցագրվում են մեկ գործիքով։ Փաստաթղթերը (ներառյալ՝ շինարարության թույլտվություններ և քաղաքաշինական այլ փաստաթղթեր) կցագրելու համար վերոհիշյալ հարթակների փաստաթղթերի կցագրման դաշտում անհրաժեշտ է ընտրել փաստաթղթի անվանումը և մուտքագրել ծածկագիրը։

Հարգելի՛ քաղաքացիներ,

Ներդրված քարտեզագրման միջավայրը համայնքներին հնարավորություն է տալիս ստանալ անընդհատ թարմացվող տարածական տվյալներ անշարժ գույքի հասցեների վերաբերյալ և ապահովել ռեեստրի տվյալների բազայի ամբողջականությունն ու ճշգրտությունը՝ սահմանված չափորոշիչներին համապատասխան։

Կադաստրի կոմիտեի https://www.e-cadastre.am/ էլեկտրոնային ծառայությունների մատուցման հարթակում ներդրվել է «Անձնական գրասենյակ» գործիքը, որը հնարավորություն է տալիս օգտատերերին իրենց պատկանող գույքերի մասով ամբողջական և ընդլայնված տեղեկատվություն ստանալ մեկ տեղից, ինչպես նաև Կադաստրի կոմիտեի կողմից մատուցվող ծառայություններից օգտվել հեշտացված եղանակով։

• Գործիքակազմը օգտատերերին տեղեկատվություն ստանալու բազմաթիվ հնարավորություններ է տալիս, որոնցից են
• Դիտել որևէ իրավունքով ձեզ պատկանող անշարժ գույքերի ցանկը,
• Դիտել ձեզ պատկանող գույքերի իրավունքի գրանցման վկայականները, որակական և քանակական տվյալները, գրանցված իրավունքները և սահմանափակումները, կադաստրային գործի փաստաթղթերը,
• Ստանալ ինքնաշխատ տեղեկատվություն՝ քաղվածքների ձևով։ Ընդ որում՝ սեփականության իրավունքով պատկանող գույքերի դեպքում այդ տեղեկատվությունը տրամադրվում է անվճար,
• Առանց գաղտնաբառի մուտքագրման դիտել կամ ներբեռնել էլեկտրոնային եղանակով տրամադրված իրավահաստատող փաստաթղթերը, հասցեի տրամադրման որոշումները, չափագրման փաստաթղթերը,
• Պարզ և առավել հեշտ տարբերակով մուտքագրել դիմումներ, որի դեպքում գույքի հասցեն լրացվում է ինքնաշխատ, իսկ «ներկայացվող փաստաթղթեր» բաժնում էլեկտրոնային եղանակով տրամադրված փաստաթղթերը դիմումին կցագրվում են ցանկից՝ առանց գաղտնաբառի լրացման։
• Հարթակի համապատասխան գործիքակազմի միջոցով հնարավոր է նաև Կադաստրի կոմիտե ուղարկել հաղորդագրություններ գույքերի ցանկում առկա սխալների (օրինակ՝ արտացոլված չէ ձեզ պատկանող որևէ գույք, կամ ցանկում առկա է ձեզ չպատկանող գույք), ինչպես նաև գույքերի արտացոլված տվյալներում հայտնաբերված սխալների վերաբերյալ։
• Համապատասխան գործիքակազմի կիրառման միջոցով հնարավոր է նաև ստանալ ծանուցումներ ձեզ սեփականության իրավունքով պատկանող գույքերի մասով, եթե դրանց նկատմամբ այլ անձանց կողմից ներկայացվել են իրավունքի պետական գրանցման կամ միասնական տեղեկանքի տրամադրման դիմումներ։
• Ներդրված գործիքից օգտվելու համար անհրաժեշտ է e-cadastre.am հարթակ մուտք գործել խիստ նույնականացման գործիքների միջոցով (eID կամ mID)։

Մարտի 25-ից ապրիլի 28-ը ընկած ժամանակահատվածում բաց թողնված ժամկետը կհամարվի հարգելի

ՈւՇԱԴՐՈՒԹՅՈՒՆ

Հարգելի քաղաքացիներ,

Հաշվի առնելով այն հանգամանքը, որ արտակարգ դրությամբ պայմանավորված սահմանափակումների պայմաններում 2020 թվականի մարտի 25-ից մինչև 2020 թվականի ապրիլի 28-ը ընկած ժամանակահատվածում Կադաստրի կոմիտեի սպասարկման գրասենյակները փաստացի չեն աշխատել, տեղեկացնում ենք, որ

«Գույքի նկատմամբ իրավունքների պետական գրանցման մասին» ՀՀ օրենքի 24-րդ հոդվածի 6-րդ մասով սահմանված 30-օրյա ժամկետը բաց թողնելը կհամարվի հարգելի, եթե նշված ժամկետի վերջին օրը լրացել է 2020 թվականի մարտի 25-ից մինչև 2020 թվականի ապրիլի 28-ը ընկած ժամանակահատվածում։